متحدہ عرب امارات کی کراچی میں دہشت گرد حملے کی شدید مذمت، پاکستان کے ساتھ اظہار یکجہتی، چین سے اظہار تعزیت

متحدہ عرب امارات نے اسلامی جمہوریہ پاکستان میں کراچی ائیرپورٹ کے قریب سڑک پر ہونے والے دہشت گرد حملے کی شدید مذمت کی ہے جس کے نتیجے میں دو چینی شہری اور ایک پاکستانی شہری جاں بحق جبکہ متعدد بے گناہ افراد زخمی ہوئے ہیں۔

متحدہ عرب امارات کی وزارت خارجہ کی جانب سے جاری بیان میں کہا گیا ہے کہ متحدہ عرب امارات ان مجرمانہ کارروائیوں کی شدید مذمت کرتا ہے اور بین الاقوامی قوانین کی خلاف ورزی کرتے ہوئے سلامتی اور استحکام کو نقصان پہنچانے کے مقصد سے ہر قسم کے تشدد اور دہشت گردی کو مستقل طور پر مسترد کرتا ہے۔

وزارت خارجہ نے پاکستان کی حکومت اور عوام، چین کی حکومت اور عوام اور اس دہشت گردانہ جرم میں ہلاک ہونے والوں کے اہل خانہ کے ساتھ دلی تعزیت اور ہمدردی کا اظہار کیا اور ساتھ ہی تمام زخمیوں کی جلد صحت یابی کے لیے دعا کی ہے۔