ორმხრივი ურთიერთობები
დიპლომატიური კავშირები კიდევ უფრო გამყარდა 2018 წელს საქართველოში არაბთა გაერთიანებული საამიროების საელჩოს, ხოლო 2020 წელს არაბთა გაერთიანებულ საამიროებში საქართველოს საელჩოს გახსნით. 2021 წელს არაბთა გაერთიანებული საამიროებისა და საქართველოს საპარლამენტო მეგობრობის კომიტეტის შექმნამ საპარლამენტო დიალოგისა და თანამშრომლობის დამატებითი პლატფორმა უზრუნველყო.
2023 წლის 10 ოქტომბერს ყოვლისმომცველი ეკონომიკური პარტნიორობის შეთანხმების (CEPA) ხელმოწერა ორმხრივ ურთიერთობებში მნიშვნელოვან ეტაპად იქცა. შეთანხმება, რომელიც ძალაში 2024 წლის 27 ივნისს შევიდა, ქმნის ჩარჩოს ვაჭრობის გაფართოებისთვის, ინვესტიციების ხელშეწყობისა და ორივე ქვეყნის ბიზნესისთვის ბაზრებზე წვდომის გაუმჯობესებისთვის.
ორმხრივ ურთიერთობებს დამატებითი იმპულსი შესძინა 2025 წლის 19 სექტემბერს არაბთა გაერთიანებული საამიროების პრეზიდენტის, მისი უმაღლესობა შეიხ მოჰამედ ბინ ზაიედ ალ ნაჰიანის ოფიციალურმა ვიზიტმა საქართველოში. ვიზიტმა ასახა ის მნიშვნელობა, რომელსაც ორივე ქვეყანა ანიჭებს პარტნიორობის განვითარებასა და თანამშრომლობის ახალი შესაძლებლობების შესწავლას.
მაღალი დონის ურთიერთოებბი 2026 წელსაც გაგრძელდა. მათ შორის, 14 იანვარს გაიმართა არაბთა გაერთიანებული საამიროების პრეზიდენტის, მისი უმაღლესობა შეიხ მოჰამედ ბინ ზაიედ ალ ნაჰიანისა და საქართველოს პრემიერ-მინისტრის, მისი აღმატებულება ირაკლი კობახიძის შეხვედრა, რომელზეც ორმხრივი კავშირების განმტკიცება განიხილეს.
2026 წლის იანვარში მინისტრების დონეზე გამართულმა განხილვებმაც წარმოაჩინა ორმხრივ ურთიერთობებში მიღწეული თანმიმდევრული პროგრესი. მხარეებმა მიმოიხილეს მიმდინარე პროექტები და განიხილეს თანამშრომლობის შემდგომი შესაძლებლობები სასურსათო უსაფრთხოების, განათლების, ტურიზმისა და კულტურის სფეროებში. ეს შეხვედრები ასახავს მათ მუდმივ მზადყოფნას, განავითარონ თანამშრომლობა სფეროების უფრო ფართო სპექტრში.
ეკონომიკური თანამშრომლობა
ეკონომიკური თანამშრომლობა არაბთა გაერთიანებულ საამიროებსა და საქართველოს შორის
არაბთა გაერთიანებულ საამიროებსა და საქართველოს შორის ეკონომიკური, სავაჭრო და საინვესტიციო ურთიერთობები ვითარდება მტკიცე ინსტიტუციური ჩარჩოს, მზარდი კომერციული კავშირებისა და გაუმჯობესებული საჰაერო მიმოსვლის საფუძველზე.
ეკონომიკური თანამშრომლობის გაღრმავებისკენ მიმართულ ძალისხმევას დამატებითი იმპულსი მიეცა 2020 წლის დეკემბერში, როდესაც ორი ქვეყნის ეკონომიკის მინისტრები შეთანხმდნენ თავისუფალი ვაჭრობის შესახებ შეთანხმებაზე მოლაპარაკებების დაწყებაზე. 2022 წლის 9 მაისს მხარეებმა ხელი მოაწერეს დოკუმენტს, რომელიც განსაზღვრავდა ყოვლისმომცველი ეკონომიკური პარტნიორობის შეთანხმებაზე (CEPA) მოლაპარაკებების პირობებს.
ბიზნესებს შორის კავშირების განმტკიცებისა და სავაჭრო და საინვესტიციო შესაძლებლობების ხელშეწყობის მიზნით, 2022 წელს ასევე შეიქმნა ორივე ქვეყნის სავაჭრო პალატების ერთობლივი საბჭო.
CEPA-ს ხელი მოეწერა დუბაიში 2023 წლის 10 ოქტომბერს და იგი ძალაში შევიდა 2024 წლის 27 ივნისს. შეთანხმება ქმნის ჩარჩოს ორმხრივი ვაჭრობის გაფართოებისთვის, ინვესტიციების ხელშეწყობისა და ორივე ქვეყნის ბიზნესისთვის ბაზრებზე წვდომის გაუმჯობესებისთვის.
ინვესტიციები ეკონომიკური პარტნიორობის მნიშვნელოვანი საყრდენია. ბოლო ორი ათწლეულის განმავლობაში საქართველოში არაბთა გაერთიანებული საამიროების ინვესტიციების მოცულობამ დაახლოებით 1,5 მილიარდ აშშ დოლარს მიაღწია. 2025 წელს საამიროების დეველოპერულმა კომპანიამ Eagle Hills-მა საქართველოში დაიწყო 6,6 მილიარდი აშშ დოლარის ღირებულების უძრავი ქონების განვითარების პროექტი, რომელიც ქვეყნის ისტორიაში ერთ-ერთი უმსხვილესი უცხოური საინვესტიციო პროექტია.
პირდაპირი საჰაერო მიმოსვლა დამატებით ხელს უწყობს საქმიან ურთიერთობებს, ტურიზმსა და ხალხთაშორის კავშირებს. ავიაკომპანიები ორ ქვეყანას შორის კვირაში დაახლოებით 50 პირდაპირ რეისს ასრულებენ, ხოლო მოგზაურობის პიკურ პერიოდებში მათი რაოდენობა 65-მდე იზრდება. 2025 წელს საქართველომ არაბთა გაერთიანებული საამიროებიდან თითქმის ნახევარი მილიონი ვიზიტორი მიიღო, მათ შორის იქ მცხოვრები უცხო ქვეყნის მოქალაქეები. ამ რაოდენობიდან დაახლოებით 15 000 ვიზიტორი საამიროების მოქალაქე იყო. იმავე წელს საქართველოდან არაბთა გაერთიანებულ საამიროებში დაახლოებით 35 000 ვიზიტორი გაემგზავრა.
კულტურული თანამშრომლობა
არაბთა გაერთიანებულ საამიროებსა და საქართველოს შორის კულტურული ურთიერთობები ვითარდება ურთიერთპატივისცემის, სტუმართმოყვარეობის საერთო ტრადიციებისა და ხალხებს შორის კავშირების განმტკიცებისადმი ერთგულების საფუძველზე. თანამშრომლობა მოიცავს განათლებას, მეცნიერებას, ხელოვნებასა და კულტურულ მემკვიდრეობას, ხოლო პირდაპირი საჰაერო მიმოსვლა და ტურიზმი კულტურული გაცვლის დამატებით შესაძლებლობებს ქმნის.
განათლებისა და მეცნიერების სფეროებში თანამშრომლობა ორმხრივი პარტნიორობის მნიშვნელოვანი კომპონენტია. 2024 წლის თებერვალში ორმა ქვეყანამ ხელი მოაწერა განათლებისა და მეცნიერების სფეროებში თანამშრომლობის შესახებ ურთიერთგაგების მემორანდუმს, რომელიც ქმნის ჩარჩოს აკადემიური გაცვლების, ერთობლივი სამეცნიერო კვლევებისა და უმაღლეს საგანმანათლებლო დაწესებულებებს შორის პარტნიორობისთვის.
ხელოვნების სფეროში გაცვლები ასევე ხელს უწყობს ორივე ქვეყნის კულტურის უკეთ გაცნობასა და დაფასებას. 2023 წლის ოქტომბერში თბილისში არაბთა გაერთიანებული საამიროების საელჩომ, საქართველოს კულტურის, სპორტისა და ახალგაზრდობის სამინისტროსთან თანამშრომლობით, გამართა ხელოვნებისა და კლასიკური მუსიკის საღამო საამიროელი და ქართველი მუსიკოსებისა და სახვითი ხელოვნების წარმომადგენლების მონაწილეობით.
საქართველოს კულტურულ ღონისძიებებში საამიროელი ხელოვანების მონაწილეობამ კიდევ უფრო გააძლიერა ეს გაცვლები. 2025 წლის დეკემბერში საამიროელმა პიანისტმა აჰმედ ალ ჰაშემიმ ბათუმის შავი ზღვის მუსიკისა და ხელოვნების საერთაშორისო ფესტივალის ფარგლებში სოლო კონცერტი გამართა, არაბთა გაერთიანებული საამიროების საელჩოს მხარდაჭერით.
ქართული საშემსრულებლო ხელოვნება საამიროების აუდიტორიასაც წარედგინა საქართველოს ეროვნული ბალეტის „სუხიშვილების“ გამოსვლებით, მათ შორის დუბაის ოპერასა და ზააბილის თეატრში. ამ წარმოდგენებმა მაყურებელს გააცნო ქართული ცეკვის ტრადიციები და კულტურული მემკვიდრეობა.
ორი ქვეყანა განაგრძობს საგანმანათლებლო და კულტურული თანამშრომლობის გაფართოების შესაძლებლობების შესწავლას. 2026 წლის იანვარში მინისტრების დონეზე გამართულ განხილვებში განათლება, ტურიზმი და კულტურა დასახელდა შემდგომი თანამშრომლობის სფეროებს შორის, რაც ასახავს მეგობრობისა და ურთიერთგაგების განმტკიცების საერთო სურვილს.
ეწვიეთ ქვეყანას
- არაბთა გაერთიანებული საამიროების მოქალაქეებს შეუძლიათ საქართველოში უვიზოდ შემოსვლა და ერთი წლის განმავლობაში (365 დღე) დარჩენა. გამგზავრებამდე გაეცანით საგარეო საქმეთა სამინისტროს რეკომენდაციებს საქართველოში მოგზაურობის შესახებ.
- არაბთა გაერთიანებული საამიროების რეზიდენტებს, რომლებიც ფლობენ მოქმედ Emirates ID-ს ან საამიროებში ბინადრობის ნებართვას, შეუძლიათ საქართველოში უვიზოდ შემოსვლა და ნებისმიერ 180-დღიან პერიოდში 90 დღემდე დარჩენა. საამიროებში ბინადრობის ნებართვა მოქმედი უნდა იყოს როგორც საქართველოში შემოსვლის, ისე საქართველოდან გამგზავრების დღეს. იხილეთ საქართველოს საელჩოს ინფორმაცია ვიზების შესახებ.
- ავღანეთის, ბანგლადეშის, კამერუნის, კონგოს დემოკრატიული რესპუბლიკის, კოტ-დ’ივუარის, ერიტრეის, ეთიოპიის, განის, მაროკოს, ნიგერიის, პაკისტანის, სომალის, სუდანის, სირიის, ტანზანიის, უგანდისა და იემენის მოქალაქეებისთვის დამატებითი პირობები მოქმედებს, როდესაც ისინი საქართველოში უვიზოდ შემოდიან საამიროებში ბინადრობის ნებართვის ან მრავალჯერადი შესვლის ვიზის საფუძველზე. მათ შეუძლიათ ნებისმიერ 180-დღიან პერიოდში 90 დღემდე დარჩენა მხოლოდ იმ შემთხვევაში, თუ საქართველოში შემოსვლის დღეს აღნიშნულ ნებართვას ან ვიზას მოქმედების ვადა სულ მცირე ერთი წლით აქვს დარჩენილი. თუ ერთ-ერთი ამ ქვეყნის მოქალაქე საამიროების რეზიდენტის ბინადრობის ნებართვის მოქმედების დარჩენილი ვადა ერთ წელზე ნაკლებია, ტურისტული მიზნით გამგზავრებამდე მან უნდა მოითხოვოს საქართველოს C1 კატეგორიის ვიზა.
- პასპორტის მოქმედების ვადა სულ მცირე 90 დღე უნდა იყოს. მოგზაურებს ასევე უნდა ჰქონდეთ მოქმედი სამოგზაურო დაზღვევა ან ჯანმრთელობისა და უბედური შემთხვევის დაზღვევა, რომელიც მოიცავს საქართველოში ყოფნის მთელ პერიოდს და რომლის მინიმალური სადაზღვევო დაფარვა 30 000 ლარია. გაეცანით საგარეო საქმეთა სამინისტროს ინფორმაციას საქართველოში დაზღვევის მოთხოვნების შესახებ.
- მოგზაურებმა თან უნდა იქონიონ საქართველოში საცხოვრებლის დამადასტურებელი დოკუმენტი, მაგალითად, სასტუმროს ჯავშანი, ასევე უკან დასაბრუნებელი ან შემდგომი მგზავრობის ბილეთი. სასაზღვრო ორგანოების მოთხოვნის შემთხვევაში, მათ ასევე უნდა შეეძლოთ საქართველოში ყოფნისთვის საკმარისი ფინანსური სახსრების არსებობის დადასტურება. საჭირო დამადასტურებელი დოკუმენტების შესახებ იხილეთ საქართველოს საელჩოს ინფორმაცია ვიზების შესახებ.
- საქართველოს მოქალაქეებს შეუძლიათ არაბთა გაერთიანებულ საამიროებში ტურისტული მიზნით შესვლა წინასწარ ვიზის აღების გარეშე და 90 დღემდე დარჩენა. იხილეთ საამიროების უვიზო მიმოსვლის სია და ინფორმაცია 90-დღიანი ვიზიტის პირობების შესახებ.
ტურიზმი არაბთა გაერთიანებულ საამიროებში
